MyTour » 遊記足跡 » 南昌+三清山+婺源6天之旅
cinnamon1015
2013-04-25 23:44:10
南昌+三清山+婺源6天之旅
查看(1774)
現時評分:
 
我的評分:
 
 6 頁 
 1/6 頁 
1
23456»
南昌+三清山+婺源6天之旅
Day 2
Day 3
Day 4
Day 5
Day 6

[隱藏]

大家好! 又係我呀! 小妹今年年頭望住個月曆, 見到復活節+清明節請2日假可以變7日長假, 無理由坐喺屋企數手指ga ma!! 我又俾旅行蟲咬啦!! 去邊好呢? 其實復活節去邊都貴…又窮又要去旅行, 於是叮一聲, 喺本人嘅待去list上揀咗三清山+婺源~近近地, 來個江西窮遊~

喺做資料搜集嘅時候, 發覺婺源嘅交通都幾唔方便…好似包車玩會比較好, 於是我又pat pat痕同男友問吓身邊嘅朋友有無興趣一齊去玩 (因為窮鬼想搵人share包車費用), 點知男友嘅舊同事莎拉竟然睬我地, 佢仲要拉埋佢2個朋友西門同阿關加入, 不過西門同阿關本身又唔識, 好神奇的「籐lung瓜」組合! 其實佢2個同我3唔識7都敢跟我去旅行, 真係勇氣可加!! 好緊張, 第一次做host同咁多朋友去旅行, 不容有失!

廢話講到呢度, 係時候出發啦~

其實我地嘅旅程嚴格嚟講係8日, 不過頭尾2日晚去早回, 為免有搵笨之嫌, 我將呢個旅程叫6日之旅算啦~

28/3 - 4/4, 2013
行程&目錄
Day 0: 香港 – 深圳 – 火車(T186)往南昌
Day 1: 南昌 (滕王閣) – 上饒 – 三清山
Day 2: 三清山 (三清福地, 西海岸景區)
Day 3: 三清山 (南清園景區) – 婺源
Day 4: 婺源 (東線: 李坑, 汪口, 江灣, 曉起, 慶源)
Day 5: 婺源 (東線: 慶源, 江嶺, 北線: 思溪延村, 彩紅橋, 嚴田古樟, 西線: 長溪)
Day 6: 婺源 (西線: 長溪, 鴛鴦湖) – 景德鎮 – 南昌 – 火車(T185)往深圳 – 香港

特別鳴謝:
平凡人幫忙於網上搶購去程T186嘅火車票~
currypuff提供婺源包車師傅資料~

Day 0: 香港 – 深圳 – 火車(T186)往南昌

&Day 1: 南昌 (滕王閣) – 上饒 – 三清山


出發當日其實仲要返工, 特別要老細批准5:30pm俾我閃人…從來無試過咁早收工~
滾水碌腳仆返屋企拎backpack就出發, 約左朋友們7:00pm喺上水火車站等~我地要去深圳搭8:09pm開出嘅T186火車~
原本時間好充裕, 不過我地唔想食火車飯, 於是莎拉同阿關喺上水為眾人買吉X家~ 點知搞咗好耐…搞到7:30pm先去到羅湖過關!!  Help…5個人裙拉褲甩極速狂奔去深圳火車站, 差不多7:55pm先去到火車站門口…唉, 下次唔好啦~~~




題外話: 出發前不停check住飛機票價, 深圳去南昌一d都唔平, 呢段時間最平竟然要5xx人仔, 仲要未連稅! 搭嗰1個鐘收我咁貴?! 於是我呢隻死窮鬼把心一橫, 決定搭火車! 但係我又遇到難題…因為T186呢班車出名難買, 我又無大陸戶口, 如果唔同其他人喺出發前20日上網搶飛應該係咁先… 唉~~ 點知…機緣巧合下喺第2個帖知道另一位師兄平凡人都係同一日坐呢班車!!! 我就嘗試搵佢幫手! 佢真係幫我地上網搶到5張硬臥!!! 實在太感動啦!!!  話說我地買完飛嘅下晝呢班車已經無哂臥鋪票…

講返正題, 我地架火車, 好興奮~
架火車終點站係瀋陽, 我地緊係唔會坐到咁遠啦~ 我地去到南昌je~






火車準時8:09pm開車~
原來車務員要收左張火車票然後換張咭俾你, 落車時又用咭換返張車票~


就係呢個吉X家, 搞到差d miss咗班車~


上咗車之後就見到坐隔離嘅平凡人同摩囉星2位師兄~
大家吹下水, 玩下啤牌, 好快就到10:00pm, 架火車突然熄咗燈~ 大家唯有休息了~
第一次去旅行無搭飛機…其實從初中開始我就有個夢想: backpack坐火車去旅行~ 唔知點解覺得呢件事好型~ 係囉, 今次終於有機會扮型~ 好開心!!
實在喜歡坐火車嘅感覺, 每一下搖晃, 又或者行車時發出嘅轟隆聲都令人著迷~ 夜深時車廂內好寧靜, 瞓喺臥鋪上聽住歌感受住車廂嘅晃動, 或者車窗外偶爾閃過嘅燈光同風景, 真在太正啦~ 一般人覺得貼$買難受嘅事情, 喺鍾意旅行嘅人心中先會感受到真正嘅意義~

經過10.5小時嘅車程, 第2日6:30am火車準時抵達南昌站~
大家狼狽地落車, 因為落慢d都俾人趕~




落車後就同平凡人&摩囉星講, 佢地要轉車去杭州~
我地就先嚟個南昌半天遊~
喺火車站先寄存行李, 每件5蚊~


放好行李後先去買下午去上饒嘅動車票, 因為要喺上饒轉車去三清山~


南昌火車站, 都幾大喎~


當時只係早上7點幾, 我地需要食個早餐先~
站外都好多選擇~ 見到呢間李先生, 中咗入去睇, 不過無乜啱食…但係喺度又撞到平凡人同摩囉星, 佢地開緊餐~


好多蔗~


結果食咗呢間, 都真係幾實惠, 一個早餐8蚊~ 不過味道一般啦~




 

食飽就出發遊覽~ 如果你係一個歷史愛好者, 南昌應該好啱你玩~ 因為呢度曾經喺1927年發生過「南昌起義」,成個城市都有好多革命嘅景點可以參觀…可惜, 我地唔係好有興趣~ 哈哈, 一場嚟到南昌, 都有一個同革命無關係嘅景點可以去, 就係滕王閣~
喺火車站搭2號內線公車就去到, 記住係內線, 因為仲有架2號外線, 上咗唔知會車你去邊~
車程約30分鐘左右就到~ 直頭有個站叫滕王閣~




又要俾$啦, 入場費50蚊~


得到AAAA嘅景點~


門外嘅警車, 似玩具車多d~


滕王閣係江南三大名樓之一, 同湖北黃鶴樓, 湖南岳陽樓齊名~ 嚟到南昌點都要留低幾條腳毛~
現場睇真係幾宏偉~








底層有個華夏聖旨博物館, 我地就中入去參觀先~


裡面有d唔知乜野朝代嘅展品, 幾個歷史白痴睇到一頭霧水~






睇咗一陣就出返嚟…正式碌入去滕王閣裡面參觀~
繼續有好多唔知乜野朝代嘅展品喺唔同嘅樓層出現~ 唉…讀得書少唔識野~






我地都有好專心睇展品ga~ 不過focus有時去咗第二度, 例如我發現咗請勿靠壓嘅英文係Qingwukaoya~


莎拉就睇咗呢份剪報, 不過佢嘅發現係右手邊有「遺尿」同「不育不孕」既野…點解唔剪走佢?


仲要喺勁當眼嘅地方有部lift…我明白某程度上係方便咗傷殘人士, 但係喺咁古舊嘅建築入面有D咁現代嘅野, 感覺真係好突兀~


我地就係咁混吉~
都係睇返風景~ 上到3樓就可以行出去, 望到贛江景色, 都唔錯喎~


右手面係八一大橋~


再繼續上去到頂樓, 個天花好靚喎~


其實買門票時就見佢寫住頂樓有仿古表演睇, 於是我地較啱時間上去睇下係咩東東~
表演開始啦~Errrrr……係有D仿古姐姐係度載歌載舞囉~~ 其他觀眾睇得好開心, 我就覺得流流地…無計啦, 我無乜藝術修養~
呢位姐姐好似咪咀~


呢位姐姐跳得好投入~






表演大約15分鐘就完啦~係頂樓望返落廣場~


跟住我地就行樓梯落返地面繼續周圍hea吓~ 從第二個角度欣賞滕王閣~


庭台樓角嘅裝飾都幾靚~



紅葉~


呢位人兄叫王勃, 佢就係《滕王閣序》嘅作者~「落霞與孤鶩齊飛,秋水共長天一色」,佢呢首代表作令滕王閣聲價十倍~ 你睇吓佢幾英~


好可惜有2個人喺隔離破壞氣氛~


Hea到差不多11點就走啦~ 時間真係唔3唔4…又未夠鐘返火車站搭車, 咁唯有睇下近近地有咩景點可以行吓,
問左Google Map, 佢聲稱行15分鐘就可以去到八一起義紀念館, 呢個都係南昌一個著名景點~ 好, 就去睇下~

沿途竟然有間幾有趣嘅Bar~



大約行左10分鐘就出事…阿Google Map明明話向前行就到啦, 實際前面係一條堀頭路囉!!
事緣係南昌起緊地鐵, 好多地方都封哂路, 阿Google Map都update唔切, 我們被老點了~
咁點算? 朋友們就提議不如行下附近D小巷, 總之朝住同一個方向就有可能去到~ 又好喎~

小巷內之景色~


點知行到盡頭, 無啦啦入咗條大街~阿Google Map話呢度原來係勝利路步行街, 係南昌市最繁榮嘅地方之一~
真係盲中中發現新大陸! 我地決定係度hea, 放棄紀念館啦~ 果然係城市老鼠~


笑咗


又有7牌~


行到11點幾, 大家都覺得係時候食午餐啦~ 好是但地去咗呢間食~


D餸擺哂出嚟任揀, 揀啱就比$~ 可能嗰日訓完火車不在狀態,完全諗唔起問吓人D餸辣定唔辣…結果, 揀咗5樣有3樣都辣到跳舞~
我同阿關都係唔辣得嘅人, 真係辣到喊~原來江西菜係偏辣, 大家如果去要留意~

 

食完就真係夠鐘返火車站啦~ 我地要搭13:18pm嘅D113次動車去上饒, 再去三清山~

5個人係勝利路打的去火車站, 都係15蚊咋, 好抵~
去寄存處拎返個backpack就準備上車~


補充資料: 南昌係無直車去三清山, 要轉車~ 有2個方法: 第1個係搭火車去玉山再轉公車, 玉山有較多公車上到三清山, 不過南昌去玉山嘅火車比較疏, 而且要搭4個幾鐘先去到, 仲要唔係動車…所以我地用左第2個方法, 坐火車去上饒再轉公車! 因為上饒都屬於大站, 有多D火車經過, 仲要係動車, 坐得舒服D~ 不過缺點係好少公車去三清山, 1日得3班…唔理啦, 去到上饒至算~





我地買咗一等座, 因為我部唉瘋就黎冇電, 我搏佢係個位度可以差電…
其實一等座同二等座只差十幾蚊, 豪俾佢唔多覺~


準時13:18pm開車, 南昌 byebye~
去上饒要2個鐘~




唉…原來呢架一等座個位無得差電…
我唯有行去車廂中間嘅洗手盆先有得差電, 就咁呆企咗半粒鐘~
3:20pm, 我地嚟到上饒啦~


出咗火車站之後就有司機兜搭我地去三清山~ 佢開價300蚊, 5個人分都ok喎~ 反正我都懶得搵公車, 就殺你~
原來上饒去三清山都幾遠, 呢程車都差不多坐咗2個鐘…
去到三清山東部索道站嘅時候, 師傅以為我地落車, 佢以為我地間青旅係呢度…唔係囉, 原來仲有一段距離…佢話要收多80蚊先去!! 咁都得?? 唉…都坐住你架車, 唔通話唔好咩…
再行前D, 突然有班人一字排開攔住哂成條路, 所有車都行唔到! 原來呢班人拍緊電視節目! 乜可以咁霸道嘅? 完全唔理其他人! 大陸真係乜都可以發生! 全部人塞哂係度點先?
更麻煩嘅事繼續發生, 有個人無啦啦走埋黎問師傅去邊, 點知俾呢個人發現我地超載! 原來佢係公安! 唔係呀fa? 佢即刻係咁影我地相囉! 頂…可憐嘅師傅, 唔知俾人罰幾多$…


係官門口俾人捉個正著~


師傅之後抄咗小路離開, 再行多20分鐘左右終於到我地嘅青旅啦~
我地架車~


三清山國際青年旅舍~




呢間青旅真心推介! 好乾淨, 我地住5人房床位, 間房勁闊落, 張床好舒服! 個廁所都超級乾淨~ 床位只係50蚊咋~ 唯一缺點係位置較偏僻, 要駁車去返三清山入口~
我, 莎拉, 阿關3個女仔同房, 另外仲有2個上海美女, 一踫面就不停吹水~






Settle down都差不多7點, 又係時候食晚飯~ 去咗對面嘅餐廳食農家菜~
唔講唔知, 青旅所在嘅地方叫畬民新村, 間餐廳又叫畬族農家菜, 原來呢度係畬族聚居地~ 中國原來有個咁嘅少數民族, 真係第一次聽~ 我今日真係學到好多野呀~


畬族小孩?? 係咁同我地玩, 我地冇文具俾你喎~


好好味嘅農家菜~










食飽就返青旅~ 老闆都幾健談, 同我地介紹點樣上三清山, 除咗坐索道仲可以徒步, 佢話行上山3個鐘左右, 仲話有個位可以逃票! 我地即刻雙眼發光!
好, 我地就徒步啦! 於是同老闆約定聽日9:00am搵車送我地去徒步起點~

今晚早D抖啦! 聽日要征服三清山!

 

 6 頁 
 1/6 頁 
1
23456»
其他精彩遊記